Talvez debería este ser un artigo adicado a esa campaña electoral que nos vai levando de pobo en pobo e nos confirma a idea de que Bruxelas está lonxe, moi lonxe. Campaña por outra banda moi interesante para comprobar o nulo interese que teñen certos partidos políticos por abordar de qué Europa podemos falar agora que está en crise o presuposto básico sobre o que se asentou a Unión Europea.
Porén, hai un tema cunha certa raíz europea que por supostamente menor pasou desapercibido para moitos medios e supoño que para a maioría da cidadanía. Isto é, o Camiño de Santiago e o retorno ao vello logo do xacobeo. O Xacobeo 2010 está aí á volta do verán e o novo goberno no canto de presentarnos o seu proxecto decide pasar a facer oposición da oposición.
Así, nun primeiro momento volvemos ao vello esquema de incluír o Turismo na Consellaría de Cultura desaproveitando todas as sinerxías que un departamento de Industria ofrece para fomentar unha importante acitividade económica, mais no canto de aproveitar o aspecto máis identitario e cultural do turismo comezamos por estabelecer que a cultura galega limita. Non sabemos con qué ou se polo norte ou o sur, pero o conselleiro afirma que limita. Máis tarde pasan a falar de que non están feitos os deberes para as exencións fiscais cando estas están recollidas na propia Lei de Orzamentos do Estado. E sen recoñecer nin unha liña do programado afirman que por gran novidade vólvese ao logo antigo de Xesús Pérez Varela.
Despois dun concurso de ideas, de todos os requerimentos legais para que sexa oficial, de ter dados os permisos necesarios para poder ser utilizado por outras comunidades se así o desexan ou dos tres anos de promoción do Camiño empregando o logo da frecha amarela co que se rotula albergues, sinalizacións, folletos… decídese que a dirección de futuro cara a adiante que marca o logo en cuestión non é a máis acertada para os tempos que corren.
Os camiños que chegan a Compostela teñen tantas significacións como as mochilas dos peregrinos que os percorren. Agardamos que nunha delas viaxe ese espírito europeo do Camiño como construción colectiva
Este texto tamén se publicou en A Nosa Terra
Sorry, the comment form is closed at this time.