Rico ou probe, algún día
¡con que contento e pracidez folgaba!
I agora, probe ou rico, ó desdichado
¡todo, todo lle falta!
En balde veñen días, pasan anos,
e inda sigros pasaran;
se hai abondosas fontes que se secan,
tamén as hai que eternamente manan;
mais as fontes perenes nesta vida
son sempre envenenadas.
Nelas o esprito que ofendido pena,
na humidá enferma do rencor se baña,
sin que dado lle sea
beber do olvido nas saudosas auguas.
¡Odio!, fillo do inferno,
pode acaba-lo amor, mais ti n’acabas,
mamoria que recorda-las ofensas.
Si, si, ¡de ti mal haia!