Apresa, Alvaro de Anido,
 vive moito en pouco tempo,
 espolea o teu cabalo
 e espoleándoo revéntao.
 ¿Que importa un nobre cabalo?
 ¿Que importan dous nin trecentos?
 O que importa, Álvaro Anido,
 é chegar cedo.

    Vai dun polo a outro polo,
 rexistra os antros terreos,
 monta na locomotora,
 sube nos grobos aéreos,
 e coa centela recorre
 do vacío o espazo inmenso:
 es home, e cansarás, Álvaro,
 correndo e correndo.