O combate de Dumbría. Eduardo Pondal.
Intrépidos gallegos
que desde antigos días
sobre a frente levades
a estreal vespertina,
se queredes ser fortes
nas épicas porfías
lembrádevos do rudo
combate de Dumbría
Animosos gallegos
que desde os priscos días
na vosa man levades
unha ardente fouciña,
se ser fortes queredes
nas belicosas lidias
recordade o famoso
combate de Dumbría.
Aos vosos nobres fillos
relembrá noite e día
os feitos denodados
da vosa xente antiga;
recordade decote
seus feitos i ousadías,
recordade o famoso
combate de Dumbría.
Pondal, E., Poesía galega completa.
Pondaliana