Camiño da serra. Florencio Delgado Gurriarán.
Camiño da serra busca o meu amor
a bela pastora que me enfeitizou.
Vén cheo de arumes
o vento da serra;
entre os carpaceiros
fungan as abellas;
o chiar dos gaios
resoa nas penas.
Camiño da serra busco os aloumiños
da lanzal pastora que me da agarimo.
Leda fonteliña
limpas augas deita;
antre as irtas uces
nascen as muleiras;
o censoli, anda
a enfeital as pedras.
A bela pastora que me enfeitizou
acheina coa avenza entre uces en fror.
Nunha campoliña
pascen as ovellas,
margaridas brancas,
herbiñas sinxelas.
O engado do monte
na i alma se adentra.
A lanzal pastora que me da agarimo
senlleira atopeina no aspro camiño,
E, miña pastora,
toda sinxeleza,
carrapucheiriña
leda, churrusqueira
E, miña pastora,
a deusa da serra.
Acheina coa avenza entre uces en fror.
todo foi lediza no meu corazón.
Lediza, lediza
no âr e na terra;
a bris, maina e tola,
faille a todo festas;
nas ponlas d’ un teixo
canta unha laberca.
Senlleira atopeina no aspro camiño
e os dous, nunha aperta, ficamos cinguidos
Seus tépedos brazos
fan doce cadea;
de amor esmorece
meu peito ao pe dela;
arelando un bico
duas bocas se achegan
O amor, satisfeito,
enche a esgrevia serra.
Delgado Gurriarán, F. , (1934), Bebedeira.
Anxo Rei