-Eu volvo pra a terra;
á túa muller Antona, ¿que lle digo?
-Pois pra non meter guerra,
porque non veñan a petar conmigo,
olvidarás que foches meu testigo.
O demais…; boi á libertade adoito…
Xa sabes o refrán, meu compañeiro:
a libertá primeiro,
e mellor que alá broa, é aquí bizcoito.
-Máis val aquí, coma que di, solteiro,
que casado e con fillos
andar alá sudando aqueles millos…
¡Entendo, compañeiro!
-Que como poida se goberne Antona,
e anque dela me doio,
como de lonxe nada sei nin oio…
Quen non sabe nin ve… sempre perdona.
Cando xa vello sea,
tornarei cos meus ósos para a aldea,
que algo lle hei de levar á terra nosa;
mais mentras mozo son, non pode ser,
porque si é por mullere,
si é que Antona está alá, teño aquí a Rosa.
-Esa che é a nai do año,
bon Antón de Riaño,
pero en verdad che digo
que as mulleres son tóda-lo enemigo,
e xa que esto así o sea,
antre a nosa i a allea
máis ou menos graciosa,
pois…, muller por muller, val máis a nosa.
-A nosa é a que nos quer e nós queremos,
que si falta o cariño,
coidando que unha pomba tes no niño,
unha cróbega tes, filla dos demos.
-Á cróbega a cabeza se lle esmaga,
e coa súa vida paga.
Mais de Antona a pacencia
¿con que lle paga, dime, a túa conciencia?
¿Que cura do seu dor a fonda llaga?
-Déixate de concencias e delores,
que non teñen lugare
tratando de mulleres e de amores.
Que ela vexa, se quer, de se curare;
e cóntalle que cando eu o tiver,
xa lle darei con que se precurare.
I agora, ¡adiós, hastra que Dios quixere!
¿QUE LLE DIGO?
Posted by admin on Maio 29, 2012
http://bitaculas.as-pg.gal/literaria/2012/05/29/que-lle-digo/
Previous Post
Sempre pola morte esperas
Sempre pola morte esperas
Next Post
Teño un niño de tolos pensamentos
Teño un niño de tolos pensamentos
Comments are closed.