Dende aquí vexo un camiño
que non sei adonde vai;
polo mismo que n’o sei,
quixera o poder andar.
Istreitiño sarpentea
antre prados e nabals,
i anda ó feito, aquí escondido,
relumbrando máis alá.
Mais sempre, sempre tentándome
co seu lindo crarear,
que eu penso, non sei por que,
nas vilas que correrá,
nos carballos que o sombrean,
nas fontes que o regarán.
Camiño, camiño branco,
non sei pra donde vas;
mais cada vez que te vexo,
quixera poderte andar.
Xa collas para Santiago,
xa collas para o Portal,
xa en San Andrés te deteñas,
xa chegues a San Cidrán,
xa, en fin, te perdas… ¿quen sabe
en donde?, ¡que máis me dá!
Que ojallá en ti me perdera
pra nunca máis me atopar…
Mais ti vas indo, vas indo,
sempre para donde vas,
i eu quedo encravada en onde
arraigo ten o meu mal.
Nin fuxo, non, que aunque fuxa
dun lugar a outro lugar,
de min mesma, naide, naide,
naide me libertará.
Dende aquí vexo un camiño
Posted by admin on Maio 11, 2012
http://bitaculas.as-pg.gal/literaria/2012/05/11/dende-aqui-vexo-un-camino/
Previous Post
Anque me dés viño do Ribeiro de Avia
Anque me dés viño do Ribeiro de Avia
Next Post
NO CRAUSTRO
NO CRAUSTRO
Comments are closed.